بالقلمكتاب الموقع

لعبة المواطن.. سليم ابو نقطة

لعبة المواطن

سليم ابو نقطة

ذكرَ مايلز كوبلاند مساعد مدير المخابرات الامريكية السابق في كتابه “لعبةُ الأمم“ . ان المخابرات المركزية درَّبت بعضًا من موظَّفيها واعدَّتهم إعدادًا دقيقا ليتقمَّسوا دور الزعماء العرب وبعض زعماء العالم لدرجة ان الادارة الامريكية كانت تعتمد عليهم في التنبؤ فيما سيتخذهُ زعماء الذين تقمّسوا ادوارهم من قرارات. وغالبًا ما تكون تنبؤاتهم صحيحة.

خطرَ ببالي وأنا أقرأ الكتاب أكثر من مرة ان اقترح على حكومتنا أن تدرّب بعض موظفيها على تقمُّصِ شخصية المواطنين الأردنين من كافة مستوياتهم المعيشية لتستعين بهم في اجتماعاتها وهي تفكر بفرض ضريبة او رفع الأسعار.

تبدأ جلسة مجلس الوزراء مع ممثلي المواطنين في اجتماع مغلق يناقشوا فيه كل ما تنوي الحكومة من فرضه على المواطنين لمعرفة إن كان بوسعهم تحمله ام لا.

يحضر وزير المالية ولديه شوال من ملفات الازمة الاقتصادية التي تعصف بنا

يقرأ وزير الإعلام محضر الاجتماع ويتلو مقترح وزير المالية المتضمن رفع الضريبة على الكهرباء ورفع أسعار المحروقات

يستمع دولة الرئيس الى رأي الممثلين بهذين القرارين

ممثل معان :…. وحد الله دولتك والله شعبك عالحديدة شو ضريبة ما ضريبة

(دولة الرئيس يبدي امتعاضه)

ممثل عبدون: ok سيدي ما في مشكلة فصّل واحنا بنلبس

(دولة الرئيس يبدي ابتهاجه

يرد ممثل الطفيلة : شو فصِّل … والله دولتك ماخليتوا اشي يستر عورتنا

يقاطعه ممثل الصويفية: يا عمو…. يا عمو … كلهن اربع خمس “أروش“ على لتر البنزين هي الخمس” اروش” مصاري.

(يبتهج دولته ثانية)

ممثل المفرق : الزم حدودك لا اقوم بهالعقال….(ينظر صوب دولة الرئيس):دولتك والله جيوبنا فاضية… مشان الله ارحمونا يعني…. هو احنا بدنا نلاقيها من العلف ولا من قلة المي ولا من فاتورة الكهربا… بكفّي دولتك بكفّي

( يزداد امتعاض دولته)

ممثل تل غبار : شو دخل العلف بالبنزين كأنك عمو مش بالمود

ممثل القطرانة : والله لو اقوملك لمودك على ظهرك وأَبُلْ فيك بالعقال

دولته يتدخل : طيب يا شيخ : اعطيني الحل…. وانت شايف وضع البلد

ممثل السلط : يعني هو حضراتكوا كل ما تضيق لازم تفضّوا جيوبنا .. دور لك حل بعيد عنا… الله يخليك.

وزير المالية: بدنا حلول يا جماعة بدنا حلول

ممثل اربد : قدامكوا ١٠٠ طريقة

وزير المالية: هات لنشوف…. شو عندك؟

ممثل اربد : سكروا الهيئات المستقلة اللي ما شفنا منها الخير… او على الاقل خلي رواتب موظفيها مثل رواتب موظفين الصحة والتربية والأحوال المدنية

وزير التخطيط: ( يهمس في أذن وزير الداخلية)

دولة الرئيس : شو كمان عندك؟

ممثل الزرقا: اسحبوا اسطول السيارات من الوزارات…. انتو مش احسن من وزرا اليابان اللي بداوموا على البسكليتات.

وزير التخطيط: لا….. تراك زودتها!

ممثل الكرك: سيدي هظول ممثلين الصويفية وعبدون وتل غبار اللي بتفلسوا بقولوا لك ok ليش ما تفرض عليهم ضريبة الرفاهية مثل ما بتعمل امريكا وبريطانيا على مواطنيها المرفهين.

ادخل قصورهم راح تطلع بمجلد ضرايب

ممثل الصويفية:… َ هادا الكلام دولتك “بدركم” أنتم مجلس الوزراء “ابل ما يدرنا”

ممثل الرمثا : دولتك اسوق عليك الله… بتعرف اوضاعنا بالرمثا؟! … بتعرف شو صار بحالنا بعد ما سكرتوا الحدود؟! … بتعرف معظم تجارنا محلاتهم مرهونة للبنوك؟! … ما بتعرف انزل عالرمثا وشوف بنفسك!… والله ما احنا ناقصين ضرايب جديدة

ممثل الشميساني : يعني خلص “اطعتوا ايدكم وشحتم عليها”…

ممثل الرمثا : بس لولاك ما انت بالمجلس ولا كان وريتك قيمتك!!!

ممثل مادبا: دولتك عندك سفارات في دوَل ما في بينا وبينهم لا علاقات تجارية ولا سياسية دولتك اغلق السفارات او حولها لمكاتب واعطي ميزانيتها لوزارة الصحة ووزارة التنمية الاجتماعية

وزير الخارجية : بالله صحيح…. والله بشوفك سكتت دهر ونطقت….

ممثل الرصيفة: سيدي الرئيس جرب زورنا وشوف الاكتضاض عندنا وشوف البنية التحتية عندنا ليش ما تعطينا امانة عمان جزء من موازنتها بدل ما تصرفها على المهرجانات ومحطة التلفزيون اللي ما منها فايده.

امين عمان: عيب هالحكي…. عيب إلزم حدودك

يختم دولته اجتماع المجلس ويقرر رفع أسعار المحروقات وفرض ضريبة جديدة على الكهرباء وعلى المتضرر اللجوء إلى الله

تعليق واحد

اترك تعليقاً

لن يتم نشر عنوان بريدك الإلكتروني.

إغلاق