جامعات و مدارس

“على سيره معدلات التوجيهي و التخصص الجامعي المناسب

-الدكتور إبراهيم الجراح من كلية الIT
سنة 1999، محسوبكم خلص توجيهي وجاب معدل 81.2 طبعا هذا المعدل عالي بهذاك الوقت واكيد اسمعتوا بسؤال النملتين بالرياضيات، هذا السؤال كان لحاله قصة، طبعاً هذا المعدل غير المتوقع لأنه من الصف الاول للصف الاول الثانوي ومعدلي مانزل عن 90، وخصوصاً الحجي رحمة الله عليه كان معشم حاله ونفسه ادرس طب (ما بنسى تلك الكلمات الي يكررها دائما كل قعده: ابراهيم بده يقرا طب … ) ولما شاف المعدل حكالي “شو بطلعلك يابه اقرا وأنا معك لأخر نفس”، وكله من الله خير، طبعاً لا الموازي كان خيار (غالي جدا) ولم يكن هناك أي مكرمة للدراسة . طبعاً انا نفسي كان أدرس حاسوب بس معدله عالي ومستحيل يطلعلي..
المهم قدمت على الجامعة، طبعاً الحجي حكالي أختار جامعة اليرموك أو التكنولوجيا “أقرب علينا وأجار الباص ١٥ قرش “، كتبنا قائمة التخصصات التي تناسب المعدل وركزنا على المواد العلمية والحمدلله طلعلي تخصص الفيزياء تنافس بجامعة اليرموك (الساعه المعتمده ب ١٠ دنانير)، ومابنسى هالموقف التالي
شافني الاستاذ مقبل رحمة الله عليه بنفس اليوم طبعا الاستاذ مقبل استاذ الفيزياء، “شو يا ابراهيم بدنا نصير زملاء شد حيلك الفيزياء بده قرايه مش تبنشر من أول سنة”.
المهم روحنا على الحجي “وانا مش عاجبني التخصص خصوصا انه اثنين بالدار دارسين فيزياء اخوي ابوتامر واختي ام عمر والله لو بدنا نخترع مفاعل نووي مو هيك”.
خبرنا الحجي وحكالي الخيرة فيما اختاره الله، طبعا أنا حكيتله ونعم بالله بس حكيتله للحجي “ترى أني من هسع بدي احول لتخصص ثاني” طبعا حكالي انت وشطارتك زي ما بدك يابه.
رحنا انا والحجي سجلنا بجامعة اليرموك فيزياء والحجي يحكيلي أهم إشي تجيب معدل وتبدع وبعدين كمل ماجستير ودكتوراه.
أول يوم دراسه رحت على قسم علوم الحاسوب، “طبعا معدل دخول الحاسوب كان 92″، وكان نفسي أنا أدرسُ حاسوب خصوصا كنت مغرم بالكمبيوتر من الصف العاشر من حصة الحاسوب، طبعا رئيس القسم حكالي بتقدر تحول بس بدك تجيب معدل جيدا جدا وتقطع 36 ساعه معتمدة.
رحنا انا والحجي عليه وحكاله إبراهيم بده يحول حاسوب شو بتنصحنا، حكالنا شو المواد الي لازم أنزلها والخطة الي امشي عليها، وفعلا أخذت المواد اللازمه وقطعت 36 ساعة وجبت والحمدلله معدل الجيد جدا مرتفع حوالي 80، وقدمت طلب التحويل بعدها وضليت على اعصابي استنى، الحمدلله طلعت نتائج التحويل وطلعلي حاسوب طبعا كان شعور لا استطيع وصفه.
رجعنا على الحجي وحكيناله وانبسط وقلي يله الكرة بملعبك بدنا معدل وبالتوفيق.
بلشنا دراسة والحمدلله ودرسنا الحاسوب وتخرجنا ب 4 سنين بمعدل جيدجدا مرتفع مع دفعتي مع انه راح عليه عدد من الساعات بسبب التحويل.
نصيحه لطلاب التوجيهي: اتبع رغبتك وشغفك وسوف تصل لهدفك يوم ما.. والمهم الرضى بما تحققه.. واهلك بهمهم فقط سعادتك..
*الصوره وانا بالصف العاشر”

تعليق واحد

  1. حلوة الصورة وانت بالصف العاشر هههههههه

    نصائحك ممتازة دكتور بارك الله فيك ، وللأسف بمجتمعنا الطالب عايش على أعصابه لإنه بده يرضي الأهل اللي ما برضوش غير بالطب

اترك تعليقاً

لن يتم نشر عنوان بريدك الإلكتروني.

إغلاق