بطل من أبطال التوجيهي المحاربين للسرطان

وجع صغير ببطني بلش ببداية الفصل الثاني وفكرنا انا ووالدي إنه وجع عادي وبروح، بعد يومين رحنا على المستشفى وتصورت وتم اكتشاف ورم سرطاني ببطني بحتاج عملية طارئة لإزالته

بعد إزالة الورم، المختبر بلغنا إنه الورم خبيث وبدأ ينتشر في جميع أنحاء الجسم، ذهبت مباشرة لطبيب مختص في مركز الحسين للسرطان وبدأت رحلت علاج الكيماوي، كانت أول جلسة ب 5-3 (قبل 90 يوم من أول امتحان وزارة)

كان الكيماوي مرهق جدََا، جلساتي كانت من الأحد للخميس، تبدأ الساعة 8 الصبح وتنتهي الساعة 4 العصر، الكل حكالي وقف توجيهي وبتعيد بعدين لكن أنا كنت مقتنع تمامََا إنه المريض ربنا بكون معه وبنصره

قدمت امتحانات التجريبي بالمستشفى، القلم بإيدي اليمين والكيماوي بإيدي اليسار، إمي كانت تبكي وحزينة على الي صار كوني أول ولد لها، والدي حكالي جملة جميلة إنه إذا زعلت وعيطت شو حتخلي لابتلاء ربنا الي أكبر من هيك!

إجى يوم النتائج، وطلع معدلي 99.10، صوت فرح عائلتي ملأ الحارة والعمارة، ولا زلت محاربََا للسرطان وقريبََا رح أدخل الجامعة ان شاء الله

الطالب حمزة الحاج علي